கட்டுப்படுத்தப் படுவதா இறை?

சகோதரர் எழில் அவர்கள் நாத்திகர்களிடமும் முஸ்லிம்களிடமும் நல்ல பெயர் கிடைக்கும் என்று நினைத்து 'இயேசு என்ற கற்பனை?' என்ற அறிவார்ந்த பதிவு ஒன்றை வைத்து தொடர்ந்து சப்பைக் கட்டு கட்டிக் கொண்டிருக்கிறார். அவருக்கு நம் வாழ்த்துக்கள்! நல்லாயிருங்க சார்!

இதே எழில்தான் இனிய இஸ்லாமிய சகோதரர்களின் மீது அக்கறை கொண்டு அவர்களை இந்து மதத்திற்கு அழைத்திருந்தார். 'எந்த இந்து மதத்தை சொல்கிறீர்கள்?' என்று நாம் கேட்ட பல கேள்விகளுக்கு இன்னும் அவரிடமிருந்து சரியான பதில் இல்லை என்பதை இங்கு நினைவு படுத்த விரும்புகிறேன்.

இந்த பதிவின் பின்னூட்டத்தில் எழில் சொல்கிறார். . "என் தூதரிடம் மட்டும்தான் சொன்னார். அதற்கு பிறகு எங்கும் சொல்லமாட்டார் என்று சொல்வதினாலும்,ஒரே இறைமகன் இவர்தான் என்று சொல்வதாலும் இந்த மதங்களின் அடிபப்டையே மற்ற மதங்களை இழிவு படுத்துவதிலிருந்து ஆரம்பிக்கின்றது. சில வேளைகளில் அப்படி இறையை கட்டுப்படுத்துவது அவர்கள் வைத்திருக்கும் "கட்டற்ற இறை" என்ற இலக்கணத்துக்கே பொருந்தாது என்பதை சுட்டிக்காட்ட வேண்டியிருக்கிறது."

முஸ்லிம்களிடம் நல்ல பெயர் கிடைக்கும்(?) என்பதற்காக அவர் இட்ட பதிவில்தான் இந்த பின்னூட்டமும் வந்திருக்கிறது.

கிருஸ்துவம் இயேசு அவர்களை இறைமகன் என்று சொல்வதாலும், இஸ்லாம் முஹம்மது நபி (ஸல்) அவர்களை இறுதி இறைத்தூதர் என்று சொல்வதாலும் இந்த மதங்கள் மற்ற மதங்களை இழிவு படுத்துகிறதாம். நான் கேட்கிறேன்.. கிருஸ்துவம், இஸ்லாம் இவற்றுக்கெல்லாம் முற்பட்டதுதானே இந்து மதம்? இன்றளவும் யார் யாரையோ நடமாடும் கடவுள்களாக வரித்துக் கொண்டிருக்கும் இந்து மதம் இந்த இருவரையும் ஏன் ஏற்றுக் கொள்ளவில்லை? அப்படி ஏற்றுக் கொள்ளாததால் இந்த இரண்டு மதங்களையும் இந்து மதம் இழிவு படுத்துகிறதா?

இறை என்பது விளக்கத்திற்கு அப்பாற்பட்டது என்று முன்பு சொன்ன எழில், இஸ்லாம் இறையை கட்டுப் படுத்துகிறது என்கிறார். இஸ்லாம் இறையைப் பற்றி என்ன சொல்கிறது தெரியுமா?

'மேலும், நிச்சயமாக இப்பூமியிலுள்ள மரங்கள் யாவும் எழுதுகோல்களாகவும், கடல் (நீர் முழுதும்) அதனுடன் கூட மற்றும் ஏழு கடல்கள் அதிகமாக்கப்பட்டு (மையாக) இருந்த போதிலும், அல்லாஹ்வின் (புகழ்) வார்த்தைகள் முடிவுறா; நிச்சயமாக அல்லாஹ் மிகைத்தவன்; ஞானம் மிக்கோன்.' (குர்ஆன் - 31:27)

சகோதரர் எழில் அவர்கள் ஒருமுறை குர்ஆன் மொழிபெயர்ப்பை படித்துப் பார்க்க வேண்டும் என்று கேட்டுக் கொள்கிறேன். படித்துப் பார்ப்பதால் என்ன வந்து விடப் போகிறது? இதை படிக்க அன்றும், இன்றும், என்றும் எந்த கட்டுப்பாடுகளும் கிடையாது.

இப்படிப்பட்ட இறையை யார் கட்டுப் படுத்துகிறார்கள் தெரியுமா? எனக்கு மின்னஞ்சலில் வந்த ஒரு தகவல் இப்படி சொல்கிறது;

இந்து மத வேதங்களைக் கற்றுணர்ந்து அதில் விற்பன்ன நிலை அடைந்த சஞ்சய் த்விவேதி ஆச்சாரியா என்பவர் இஸ்லாத்தை ஏற்று முஹம்மது அப்துல் முனீம் என பெயர் கொண்டிருக்கிறார். இவர் அஹமது பண்டிட் எனவும் அன்போடு அழைக்கப்படுகிறார்.

பள்ளிப் பருவத்திலேயே சக முஸ்லிம் மாணவன் ஒருவனின் ஐவேளைத் தொழுகைகளைப் பேணுதலுடன் பின்பற்றும் சீரிய ஒழுக்கம் முதலில் இவரைக் கவர்ந்திருக்கிறது. பள்ளி ஆசிரியர்களின் தண்டனைக்கு பயப்படாமல் அந்த முஸ்லிம் மாணவர் தனது தொழுகைகளை பின்பற்றியிருக்கிறார். இது பற்றி அஹமது பண்டிட் அந்த மாணவரிடம் 'பள்ளி நேரம் முடிந்த பிறகு தொழலாமே?' என்று வினவியபோது அவர் சொன்னார், "மன்னியுங்கள் பண்டிட்ஜி, நீங்கள் உங்கள் வீடுகளிலோ அலுவலகங்களிலோ ஒரு சிறிய இடத்தை ஒதுக்கிக் கொடுத்து உங்கள் கடவுளரை கட்டுப் படுத்தி வைத்திருக்கிறீர்கள். ஆனால் முஸ்லிம்களாகிய நாங்கள் அந்த இறைவனால் கட்டுப் படுத்தப் பட்டிருக்கிறோம். குறிப்பிட்ட நேரத்தில் நான் தொழவில்லை என்றால் மறுவுலகில் நான் அதற்கான தண்டனையை பெற்றுக் கொள்ள வேண்டியிருக்கும். அந்தத் தண்டனையோடு ஒப்பிட்டால் இந்த உலகில் எனக்கு கிடைக்கும் தண்டனை ஒன்றுமேயில்லை"

அந்த முஸ்லிம் மாணவரின் இந்த பதில்தான் ஆச்சார்யா சஞ்சய் த்விவேதியை அஹமது பண்டிட் ஆக்கியிருக்கிறது.

இப்போது சொல்லுங்கள், இறையை கட்டுப்படுத்துபவர்கள் யார்? இறைவனால் கட்டுப்படுத்தப் படுபவர்கள் யார்?

இந்த பதிவிலேயே சகோதரர் கால்கரி சிவா அவர்கள் இன்னொரு அறிவார்ந்த பின்னூட்டம் வைத்திருக்கிறார்கள்.

"நம் புராணங்கள் கதை என ஏற்றுக் கொள்ளும் அறிவு நம்மிடம் இருக்கிறது. இறைத்தூதன், இறைமகன் என்பவைகளும் கற்பனைகளே என ஏற்றுக்கொண்டுவிட்டால் ப்ரச்னைகள் இல்லையே. அந்த அறிவு இல்லாதால்தானே இவ்வளவு ப்ரச்னைகளும். "

உங்கள் புராணங்கள் கதை என்றால் மற்றவர்களின் நம்பிக்கைகளும் கதையாகத்தான் இருக்க வேண்டுமா என்ன? எவ்வளவு நாளைக்குத்தான் கண்ணை மூடிக் கொண்டு உலகம் இருண்டு விட்டது என்று சொல்லிக் கொண்டிருக்கப் போகிறீர்கள்? கண்ணைத் திறந்து பாருங்கள் சார்!